Haqqımızda

Azərbaycanın ən qabaqcıl nəşriyyatı, "Hər gün yeni bir kitab" devizi ilə fəaliyyət göstərən "Qanun Nəşriyyatı"nın əsası 1992-ci il 18 yanvarda qoyulub. "Qanun Nəşriyyatı" 1996-cı ildən müstəqil nəşriyyat kimi fəaliyyət göstərir. Nəşriyyatın təsisçisi Şahbaz Xuduoğlu, 2024-cü ilə qədər həm də nəşriyyatın direktoru kimi fəaliyyət göstərib. 2024-cü ilin avqust ayında Ayan Etibar Nəşriyyatın icraçı direktoru, Aygün Əziz isə baş redaktoru təyin edilib. Şahbaz Xuduoğlu Nəşriyyatda təsisçi və naşir olaraq fəaliyyətini davam etdirir.

Nəşriyyat ilk illərdə əsasən, hüquq ədəbiyyatı nəşr edirdi. Hazırda isə bədii və tərcümə ədəbiyyatının nəşrinə üstünlük verilir və Azərbaycan kitab bazarında əksər kitablar "Qanun Nəşriyyatı"na məxsusdur. "Qanun Nəşriyyatı" bütün sahələrdə: bədii ədəbiyyat, fəlsəfə, tarix, iqtisadiyyat, tibb, coğrafiya, elmi-fantastika, uşaq ədəbiyyatı, din, mətbəx və sağlamlıqla bağlı kitablar nəşr etməklə fəaliyyətini ilbəil genişləndirir. "Qanun Nəşriyyatı"nın gənclərlə bağlı başladığı "Birinci kitab" və "Ən yeni ədəbiyyat" seriyası cəmiyyətdə populyarlıq qazanmışdır.

"Qanun Nəşriyyatı" bir çox Nobel mükafatı laureatının: Qabriel Qarsiya Markes, Orxan Pamuk, Herta Müller, Jan-Mari Qustav Le Klezio, Joze Saramaqo, Alber Kamü və başqaları ilə yanaşı, Bernhard Şlink, Corc Oruell, Mark Levi, Paulo Koelyo, Den Braun, Riçard Brenson, Devid İqlmen, Yuval Noa Harari, Ekhart Tolle, Salman Rüşdi, C. R. R. Tolkin, Ronda Bern, Stiven Hokinq, Frans Kafka kimi dünyaca oxunan yazarların əsərlərini türk, rus, ingilis, alman, fransız dillərindən Azərbaycan dilinə tərcümə etmişdir.

"Qanun Nəşriyyatı" "Dünya klassikləri" seriyasında Fyodor Dostoyevski, Lev Tolstoy, Toni Morrison, Anton Çexov, Viktor Hüqo, Teodor Drayzer, Ceyn Ostin, Con Steynbek, Cek London, İvan Turqenyev, Tomas Mann, Aleksandr Puşkin, Çarlz Dikkens, "Azərbaycan klassikləri" seriyasında isə Məmməd Səid Ordubadi, Mikayıl Müşfiq, Cəfər Cabbarlı, İlyas Əfəndiyev, Hüseyn Cavid, Cəlil Məmmədquluzadə, Yusif Vəzir Çəmənzəminli, İsmayıl Şıxlı və digərlərinin əsərləri çap olunmuşdur.

"Qanun Nəşriyyatı" 2021-ci ildə I Milli Kitab Sərgisini təşkil etməklə Azərbaycanda ilk dəfə kitabçıların, naşirlərin, yazıçıların özünün təşkil elədiyi müstəqil yarmarka-sərginin əsasını qoyub. Bu günə qədər 6 Milli Kitab Sərgisi uğurla keçirilib və on minlərlə kitabsevər, yüzlərlə yazıçı, tərcüməçi, onlarla nəşriyyat və kitab satıcısı bu tədbirlərdə iştirak edib.

"Qanun Nəşriyyatı"nın təsisçisi Şahbaz Xuduoğlu və "Əli və Nino" Kitab Mağazaları Şəbəkəsinin sahibi Nigar Köçərli tərəfindən 2023-cü ildə "Təkərli kitab dükanı" adlı maraqlı layihə təsis edilib. Layihənin yaradılmasında məqsəd kitabı daha da əlçatan etməkdir. Bu səyyar dükan bir maşından ibarətdir və Azərbaycanı qarış-qarış gəzərək ən ucqar kəndlərdə yaşayanlara həm sərfəli qiymətlə kitablar təqdim edir.

     Müxtəlif mövzularda kitablar çap edən nəşriyyatın "Yonca", "Postmodern" və "Dinlə kitab" adlı fərqli əmtəə nişanları mövcuddur.

"Dinlə kitab" audio-kitab layihəsi çərçivəsində "Qanun Nəşriyyatı"nın çap etdiyi kitablar tanınmış aktyorlar və qiraətçilər vasitəsilə səsləndirilir. Xalq artistləri Vidadi Həsənov və Sabir Məmmədov, əməkdar artist Hüsniyyə Mürvətova, aktyorlar Ramil Zeynalov, Azər Aydəmir, Kamal Yaşar, Kəmalə Mustafayeva, Ramiz Qəmbər, Cavid Baba, Günəş Bağırsoy, tanınmış radio aparıcıları Aygün Osmanlı, Müjgan Namidar, Lalə Əliyeva, Allahverdi Qurbanov, Fatma Qafarova və başqaları kitablarımızın səsləndirilməsində iştirak edib. Rejissor Elvin Adıgözəl Dinləkitab.az saytının sifarişi ilə Səməd Behrənginin "Balaca qara balıq" əsərinin radio-tamaşasını hazırlayıb. Tamaşa sayt vasitəsilə yayımlanıb və böyük maraqla qarşılanıb. Dinləkitab.az saytında dünyasını dəyişmiş məşhur xalq şairlərinin və yazıçılarının nadir səs yazıları yayımlanıb. Həmçinin könüllü qiraətçilər vasitəsilə şeir və hekayələr hazırlanıb, ödənişsiz paylaşılıb. Səsləndirilmiş kitabların əlçatan olması məqsədilə saytla yanaşı, xüsusi mobil tətbiqlər də yaradılıb. Sayt və mobil tətbiqlər audio-kitab həvəskarlarının telefon, musiqi oxudan, kompüter, televizor və s. bu kimi müasir avadanlıqlarda rahatlıqla şeir, inkişaf və motivasiya, roman, elmi və bədii ədəbiyyatın müxtəlif nümunələrini dinləmələri üçün nəzərdə tutulub. Layihə çərçivəsində həm yerli, həm də xarici ədəbiyyat nümunələri səsləndirilərək audio-kitab formatında təqdim edilir. "Dinlə kitab" komandası sifariş əsasında audio-kitabların hazırlanmasını da həyata keçirir.

“Yonca” Nəşrləri (tam adı: “Yonca” Uşaq Nəşrləri Redaksiyası) 2023-cü il 27 fevral tarixində fəaliyyətə başlayıb. Redaksiya Azərbaycanın ən böyük kitab sənayesi mərkəzlərindən biri sayılan “Qanun Nəşriyyatı"nın bazasında naşir Şahbaz Xuduoğlunun təşəbbüsü ilə yaradılıb. Redaksiyanın əsas fəaliyyəti 0-6 yaş arası auditoriya üçün müxtəlif öyrədici, əyləncəli, ensiklopedik, bədii və kütləvi nəşrləri tərtib edib çapa hazırlamaqdan ibarətdir. Redaksiya balaca oxucular üçün praktik olaraq bütün janrlarda kitablar tərtib edir, müəlliflərə sifariş verir, müxtəlif xarici nəşrlərin çap hüququnu almaqla onların ana dilimizdə yayılmasına şərait yaradır. Qısa zaman ərzində redaksiya yüzə yaxın kitab üzərində tərtibat işini tamamlayıb və otuza yaxın kitab çap olunub. Redaksiya Sevda Bəxtiyar, Vüqar Haqverdiyev, Aida Hacıyeva, Əyyub Qiyas kimi yerli uşaq yazarları və uşaq kitab tərtibatçıları ilə əməkdaşlıq edir, yerli və xarici müəlliflərlə birgə fəaliyyət proqramı üzərində işləyir. “Yonca” uşaq nəşrləri redaksiyası Bakı şəhəri, Tbilisi prospekti 76 ünvanında fəaliyyət göstərir. “Yonca” uşaq nəşrləri redaksiyasına aparıcı redaktor Əyyub Qiyas rəhbərlik edir.

"Qanun" elmi-hüquq jurnalı: "Qanun Nəşriyyatı"nın təsisçisi Şahbaz Xuduoğlu tərəfindən təsis edilmişdir. Jurnal 8 yanvar 1992-ci ildən etibarən çap olunan dövri elmi nəşrdir. Jurnalın əsas məqsədi hüquq elminin inkişafı, hüquq və qanunçuluğun təbliği, cəmiyyətin hüquqi maarifləndirilməsi işində elmi platforma kimi yaxından iştirak etməkdir. Jurnalda tanınmış hüquqşünas alimlərin, doktorant və dissertantların, magistrantların, praktik hüquqşünasların hüququn müxtəlif sahələri üzrə elmi-praktiki məqalələri mütəmadi olaraq dərc edilməkdədir. Məqalələr Azərbaycan, rus və ingilis dillərində dərc olunur. Jurnalın redaksiya heyətinə ölkəmizin və Rusiya Federasiyasının tanınmış hüquqşünas alimləri daxildir. Jurnal Azərbaycan Respublikası Ədliyyə Nazirliyi Hüquqi Şəxslərin Dövlət Qeydiyyatı üzrə Bakı Bölgə Şöbəsində qeydə alınmışdır. Qeydiyyat şəhadətnaməsi: № 0104-P83-41555. Jurnal Azərbaycan Respublikasının Prezidenti yanında Ali Attestasiya Komissiyası Rəyasət Heyətinin 16 may 2014-cü il tarixli (protokol № 07-R) qərarı ilə "Hüquq elmləri” üzrə "Azərbaycan Respublikasında dissertasiyaların əsas nəticələrinin dərc olunması tövsiyə edilən dövri elmi nəşrlərin siyahısı"na (15-ci bənd) daxil edilmişdir. Jurnal ayda bir dəfə, hər ayın 20-dən sonra nəşr edilir. “Ian’s collection” “Qanun Nəşriyyatı"nın bazasında, naşir Şahbaz Xuduoğlunun təşəbbüsü ilə yaradılıb. İngilis dilində kitablar nəşr edir. "Postmodern layihəsi" 2023-cü ildə “Qanun Nəşriyyatı"nın bazasında naşir Şahbaz Xuduoğlunun təşəbbüsü ilə yaradılıb. Daha çox mədəniyyət sahəsində, art mövzulu kitabların nəşri ilə məşğuldur.

2021-ci ildə "Qanun Nəşriyyatı"nın rəhbəri Şahbaz Xuduoğlu 6-cı İstanbul Beynəlxalq Nəşriyyatlar görüşü​ – Müəllif Hüquqları Mükafatı (Istanbul Copyright Awards – 6th Istanbul Publishing Fellowship Program) tədbirində iştirak edib. Naşir proqram çərçivəsində keçirilən müsabiqədə qalib olub və 6 min dollar mükafat alıb.

"Qanun Nəşriyyatı"nın missiyası: Kitab nəşr etmək "Qanun Nəşriyyatı"na görə vacib missiyadır. Bu missiya kitabın nəşri ilə bitmir, əsas məqsəd mədəniyyət və elmin yayılması ilə cəmiyyətin intelektual zənginliyinə nail olmaqdır. Hər bir azərbaycanlının evində kitab və kitabxana olmalıdır. Hər kəs oxumağı və oxumaqla böyüməyi, dünyəviləşməyi özünün həyat kredosuna çevirməlidir. Kitab mənəvi ehtiyacın tərkib hissəsi olmalıdır. "Qanun Nəşriyyatı"nın təqdim etdiyi kitablar insanlarımızın həyat keyfiyyətini pisdən yaxşıya, yaxşıdan əlaya dəyişəcək.

"Qanun Nəşriyyatı"nın məqsədi: "Qanun Nəşriyyatı"nın əsas məqsədi məzmun və çapına görə ən yüksək keyfiyyətli kitabları təqdim edən, yaradıcı heyətin və oxucuların tərəqqisini daim dəstəkləyən ölkədə, həmçinin regionda ən qabaqcıl nəşriyyat evi olmaqdır. Mirzə Fətəli Axundov, Ömər Faiq Nemanzadə, Həsən bəy Zərdabi, Mirzə Ələkbər Sabir və digər böyük mütəfəkkirlərin irsinin mənəvi varisi kimi maarifçilik dəyərlərini davam etdməklə bu yolu gələcəyə aparmaqdır. Dünyanın mədəni və intellektual ədəbi irsini təşkil edən ən qabaqcıl ədəbiyyat nümunələrinin ana dilimizdə nəşri və oxucularımıza çatdırılması, müasir kitab mədəniyyətində ən yeni ədəbiyyat nümunələrini çatdırmaqla mayak rolu oynamaq əsas məqsədimizdir.