Hər gün yeni bir kitab

QANUN NƏŞRLƏR EVİ

Qanun.Az | Kitablar | Ədəbiyyat

Giriş

 Səbət

Səbət
İstifadəçi

Giriş
Menyunu bağla

Detektiv

Kateqoriyalar

Cildi

Müəlliflər

Tərcüməçilər

Stenoqrafçı qız divanın arxasından kişi cəsədi aşkar edir… Şeyla Veb ona verilən təlimata əsasən Vilbraham Kresent küçəsi, 19 nömrəli evə daxil olmuşdu. Evə daxil olduqdan sonra dəhşətli hadisə ilə qarşılaşdı; qonaq otağının döşəməsində sərilmiş bir kişi cəsədi... Cinayətin Puaroda maraq oyandıran tərəfi isə zaman faktoru idi. Şokda olmasına baxmayaraq Şeyla ququ saatının üçü vurduğunu aydın bir şəkildə xatırlayırdı. Lakin qonaq otağındakı dörd saat isə saat 4.13-ü göstərirdi. Ən qəribəsi isə bu saatlardan sadəcə biri ev sahibinə məxsus idi!


Rus yazıçısı Boris Akuninin “Qara Şəhər” romanı Azərbaycan oxucusu üçün ikiqat maraqlı olacaq. Çünki əsərdə hadi­sələr Bakıda, Qara şəhərdə, Yasamalda, İçərişəhərdə, Bibi­heybətdə cərəyan edir.
Əsərdə köhnə Bakı təsvir edilir. Hiss olunur ki, müəllif o dövrü, Bakının ictimai-siyasi, demoqrafik durumunu, neft fəv­varələri ilə varlanmış şəxslərin təmtəraqlı həyatını yaxşı öyrənib.
Bundan başqa, əsərdə Bakının Rusiyanın ucqar bir əyalət şəhəri olduğu, burada yaşayan ermənilərlə azərbaycanlıların münasibətləri dolğun şəkildə təsvir olunub.
Aydın olur ki, Bakı Rusiya imperiyasının ucqar şəhəri olsa da, buradakı həyat Moskva, Peterburq və Tiflisdəkindən də bahalıdır. Burada milyardlar dövr olunur, ona görə də istər imperiyanın özünün, istərsə də xarici dövlətlərin diqqət mərkəzindədir. O dövrdə yeni-yeni təşkilatlanan inqilabçı partiyalar da Bakıdakı milyonlardan öz nəsiblərini almaq, buradakı fəhlə sinfinin gücündən istifadə etmək istəyirlər.
Əsərin qəhrəmanı Erast Petroviç Fandorin Bakıya bacarıqlı və ələkeçməz bir inqilabçı-terrorçunu zərərsizləşdirməyə gəlir və elə qatardan endiyi andan etibarən başına ardı-arası kəsilməyən macəralar gəlir.
“Qara Şəhər” romanının ən maraqlı obrazlarından biri qoçu Qara Qasımdır. O, Fandorini ilk gündən son gününəcən müşayiət edir və sonda əsərin ən gözlənilməz personajı olduğu bilinir.
Böyük ehtimalla əsərin rezümesi olaraq gəlinən qənaət heç bir tarixi sənədə əsaslanmır və sırf yazıçı təxəyyülünün məhsuludur, amma əsərdən belə anlaşılır ki, I Dünya müharibəsinin başlanmasının başlıca səbəbi Qara Qasımın bir hərəkəti olub. O bunu etməsə, dünya müharibəsinin qarşısı alınacaqmış...
Bunu bilməkdən ötrü “Qara Şəhər”i oxumaq lazımdır.


Romanın qəhrəmanı, Rikin oğlu, Tomun atası, İngiltərə Təhlükəsizlik xidmətinin uğurlu məmuru Maqnus Piyem kimdir? Onun təhsilinə kimlər xüsusi nəzarət edirdi? O, kimin adamıdır? Maqnusun qəfildən yoxa çıxmağı təkcə onun dostlarını və həyat yoldaşını nigarançılığa salmamışdı, düşmənləri də xeyli narahat idi. Dövlət sirri təhlükə altındadır. Piyem haqqında həqiqətlər tədricən ortaya çıxır. Oxucu roman boyu məşəqqətli mübarizənin nəticəsində Maqnus Piyemin mükəmməl bir xəfiyyəyə necə çevrildiyinin şahidi olur.
John Le Carre romanları klassik xəfiyyə janrının ən dəyərli nümunələrindən biridir. Onun məharətlə yazılmış romanları dünyada böyük oxucu kütləsi qazanmasına səbəb olmuşdur. John le Carreyə ən böyük uğur gətirən əsər “Sonuncu Xəfiyyə” romanıdır.

Çağdaş Amerika ədəbiyyatının ən nəzərə çarpan yazıçılarından biri olan Paul Austerin “Nyu York Trilogiyası” “Ölümdən əvvəl oxunmalı 1001 əsər” siyahısındakı əsərlərdəndir. Bu kitab – “Şüşə Şəhər”, “Qarabasmalar” və “Qıfıllı Otaq” romanlarından ibarətdir. Dedektiv romanla postmodern strukturun sintezindən ibarət olan və Kafka yaradıcılığına uyğun bir üslubla yazılmış üç romanda yazıçı öz oxucusunu qıfıllı otaqlarda, keçmişdə və gələcəkdə, təhlükəli küçələrdə, xaotik və qarışıq xarakterə bürüdüyü qəhrəmanının arxasınca gəzdirdiyi ərəfədə, romanın hər səhifəsinə səpələdiyi kiçik işarələrə məna verməyi oxucunun öhdəsinə buraxır. O, qəhrəmanlarını həqiqi və ya xəyali qıfıllanmış otaqlara salır, azadlığı ancaq oradan qaçıb xilas olaraq əldə edə biləcəkləri bir dünya qurur, xilas üçün açarlar da verir. “Nyu York Trilogiyası” adi oxucu üçün sadəcə qıfıllı bir otaq və ya güzgülərlə doldurulmuş dəhlizdir, peşəkar oxucu üçün isə bu trilogiya, dünyanı tamamilə başqa prizmadan gözlərimizin qabağında nümayiş etdirərək ruhumuzdakı yaraları göstərən bir ümmandır.

Komissar Meqre Brüsseldə olarkən qəribə bir hadisənin şahidi olur. Cılız bir kişi külli miqdarda pulu sayaraq Parisə göndərir. Meqrenin instinktləri ona bu adam haqda nələrsə deyir. Komissar qatara minərək kişini Almaniyaya qədər təqib edir. Nələrsə çox tərs gedir və kişi ölür. Oynadığı təsadüfü rol Meqreni məyus edir. Lakin sonradan kişinin ölümü ətrafında iyrənc faktlar bir-bir açılır. Əsər vicdan əzabının insana verdiyi ağır yükdən bəhs edir. Bu yük həddindən çox ağırlaşanda faciə baş verir.
Amerika yazıçı-jurnalistləri: Fletçer Nobel və Çarlz Beylinin qələmə aldıqları "Mayın yeddi günü" romanı siyasi detektiv janrının ən parlaq nümunələrindəndir. Bunu əsərin 50-dən artıq əcnəbi dilə tərcümə olunması, milyonlarla nüsxədə və təkrar-təkrar nəşr edilməsi də sübut edir.
Romanda hadisələr Amerikada baş verir. Pentaqon rəhbərliyinin ABŞ-da mülki hakimiyyəti ələ keçirmək təşəbbüsü və kimlər tərəfindən bu niyyətin qarşısının alınması yolları əsərdə olduqca axıcı bir dillə təsvir edilmiş, hadisələrin dinamikliyi, dramatizmi çox gözəl işlənib hazırlanmışdır.
Hiss olunur ki, bu roman bir o qədər də təxəyyül məhsulu deyil, Amerika tarixinin son 50 ilində baş vermiş hadisələrin bədiiləşdirilmiş təsviridir.
Əsərdə prezident Limenin obrazı parlaq işlənilib. Məhz bu siyasi liderin örnək fəaliyyəti nəticəsində ABŞ öz konstitusiyasından kənara saçmır və prezident təkcə baş verə biləcək dövlət çevrilişinin qarşısını almaqla kifayətlənmir, həm də başqalarına pis nümunə olmasın deyə, cəmiyyətin fikrində çaşqınlıq yaranmaması üçün onu müvəffəqiyyətlə ört-basdır edir.


Komissar Meqre seriyasında ailə bağlarının zəifliyini, dağıdıcı bədbəxtliyi və xəyanəti ustalıqla nümayiş etdirən bənzərsiz bir əsərdir.
Daha açıq olmaq və qaranlıq qalan bütün detalları özü doldurmaq yerinə, daha çox ondan qaçana oxşayırdı. Kişinin üzü o qədər buğlanmışdı ki, onu insana bənzətməkdə, yəqin ki, hamı çətinlik çəkərdi. Nəzəri olaraq, bu portret kifayət qədər yaxşı idi, lakin indi onun detalları diqqəti toplamağa maneə olan bir görünüş ilə əvəz olunmuşdu.
Müsyö Qalenin ölümünün bütün aspektləri öz-özlüyündə saxta görünür. Mərhumun altında gəzdiyi adı, ehtimal olunan peşəsi, daha narahat hiss etdirən isə… ailəsinin kədəri. Onların təkəbbürü bədbəxt adamla bağlı qeyri-adi hissləri gizlədir. Bu həyəcanverici hekayədə Meqre dəhşətli həqiqəti və yalanın arxasında gizlənən əsl cinayəti aşkar edəcək.


...Nyu-York sutenyoru ilə Montananın ucqar bir guşə­sində yaşayan fanatik-ekstremistin nə əlaqəsi ola bilər? Ta­mamilə qeyri-adi bir qətl üsulu: qurbanını öldürməzdən qabaq ona güclü anesteziya iynəsi vurulur. Qatil sanki ölümə məhkum edilmiş adamı ağrıdan azad etməyə çalışır. Gənc, iddialı jurnalist Vilyam Monro iki müəmmalı qətli törədən manyak haqqında yazdığı silsilə yazılarla məşhurluğun astanasındadır. Amma dəst-xətti ilə bu iki qətlə tamamilə uyğun gələn üçüncü qətl dünyanın o biri başında – Hindistanda baş verir. Doğrudanmı, bu qətlləri bir adam yox, bütöv bir təşkilat törədir? Onun üzvləri nəyə nail olmaq istəyir? Onlar kimdir? Qurbanlarını hansı prinsiplə seçirlər? Axtarışlarda Vilyama kömək etməyə razılıq verən keçmiş tələbə yoldaşı təsdiq edir ki, bütün bu sualların cavabı qədim salnamələrdə və onun böyüdüyü dini icmanın rəvayətlərindədir...

Conatan Payn – həyatın od-alovunun yandırdığı, görünməz cəbhənin əsgəri rahatlıq və sakitlik axtarışı ilə istefaya çıxır. O, Sürixin ən dəbdəbəli mehmanxanası olan “Mayster-Palas”da gecə inzibatçısı işinə düzəlir. Burada mehmanxananın arzuolunan sakini və zəngin əhli-kef Onslou Rouper adlı biri ilə rastlaşır. Bir müddət sonra Conatana məlum olur ki, o, iri beynəlxalq silah alverçisi və... Conatanın sevdiyi qadının – Sofinin qatilidir. Rouperdən qisas almaq istəyi Paynı yenidən Britaniya kəşfiyyatına xidmətə qaytarır. O, silah alverçiləri sindikatının məhv edilməsi üzrə qrupa daxil olmağa razılıq verir. 

Cəmşid Əmirovun “Brilyant məsələsi” və “Qara Volqa”” kitabları 60-cı illərdə yazılmış və oxucuların böyük marağına səbəb olmuşdur. Yazıçının “Qara Volqa”“ əsəri Azərbaycanda cinayətkar qrupun törətdiyi saysız-hesabsız cinayətlərdən və nəhayət, hüquq-mühafizə orqanları tərəfindən aşkarlanmasından bəhs edir.

Beynəlxalq triller müəllifi Skandinaviyanın bir sahil kəndində baş verən dəhşətli qətlin təfsilatı ilə oxucunu az qala elektrik gərginliyinə bağlayır. Erika Falk ata-anasının ölümündən sonra öz doğma kəndinə, İsveçin kiçik və ucqar Felbakka kəndinə gəlir və burada başqa bir faciə ilə rastlaşır: qadının uşaqlıq rəfiqəsi Aleks intihar edib. Aleksin nəşini də o özü tapır – hamam vannasının dondurulmuş suyunda, biləkləri doğranmış halda. Erika ağlına sığışdıra bilmir: hər şeyi olan gözəl bir qadın canına niyə qıysın? Polis detektivi Patrik Hedstromla birlikdə onlar Aleksin uşaqlıq həyatından dəhşətli şeylər öyrənirlər. Baş verənləri öyrəndikcə Erika və Patrikin marağı onları bir-birinə daha da yaxınlaşdırır, flört və eşqbazlıq qarşısıalınmaz cazibə ilə onları ağuşuna alır. Tezliklə bir şey aydın olur: qətlin sirri açılmaqdadır, amma kimsə var ki, buna mane olmağa, hətta bunun üçün daha birisini öldürməyə hazırdır.



“Dumanlı diyar” ingilis yazıçısı Artur Konan Doylun 1926-cı ildə nəşr olunmuş romanıdır. Əsər Professor Çellencerdən bəhs edən üç kitabdan sonuncusu olsa da, bu roman daha çox professorun qızı Enid və dostu Edvard Melouna fokuslanır. “İtirilmiş dünya” əsərindəki Lord Con Rokston obrazı da romanın ikinci hissəsində iştirak edir.
Professorun həyat yoldaşı Cessikanın vəfatından sonrakı dövrdən bəhs edən bu roman ölümdən sonrakı həyatdan, spiritualizmlə xristian kilsəsinin rəqabətindən və əlbəttə ki, personajlarımızın başına gələn maraqlı əhvalatlardan bəhs edir.
Romanın sonunda professor Çellencer spiritualist olur və roman müəllifin ömrünün sonlarına yaxın mənimsədiyi inancını – spiritualizm konsepsiyasını təbliğ edir.
Bu roman ilk dəfə 1925-ci ilin iyulundan 1928-ci ilin mayına qədər “The Strand” jurnalında hissə-hissə nəşr edilib.

"Latış Pietr" romanı 1930-cu ilin oktyabr ayında dönəmin "Ric et Rac" jurnalında yayınlandıqdan səkkiz ay sonra Meqre seriyasının ilk dedektiv romanı olaraq 1931-ci ildə nəşr edilmişdir. Əvvəlcə müəllif xarizmalı qəhrəmanı və ya qadın qəhrəmanı olmayan, dövrün dedektiv romanlarından tamamilə fərqlənən və hekayə etibarilə müsbət nəticələnməyən bu romanı nəşr etməyin tərəfdarı deyildi. Ancaq bəzən həyat işləri başqa cür qurur; beləcə, komisar Meqre düz 75 romanda və 28 hekayədə 103 cinayət işi araşdırmağa başladı.
Belçika ədəbiyyatının klassikasına çevrilmiş bu roman müəllifinin dəsti-xəttini daşıyan bütün elementləri özündə birləşdirir: effekt, dram və şübhə pərdəsinin aralanmasını və ya cinayətdə səhvə yol verilməsini gözləyən Meqrenin səbri...
“Göy yaqut” ingilis detektivinin ustası Artur Konan Doylun ən maraqlı hekayələrindən biridir. Şerlok Holms və onun dostu doktor Uotson əllərinə keçən qara rəngli, köhnə və çirkli şlyapanın vasitəsi ilə çox qiymətli bir daşın oğurlanmasına dair müəmmalarla dolu bir hadisəni təhqiq edirlər. Bütün dövrlərin xəfiyyəsi Şerlok Holms müşahidəçilik qabiliyyətinin gücü ilə növbəti cinayətin üstünü açır.
Doktor Uotson Milad bayramı münasibətilə Şerlok Holmsu təbrik etmək üçün onun yanına gəlir. Şerlok Holms ona köhnə şlyapa və Milad bayramı üçün alınmış qaz haqqında danışır. Şerlok Holms “Kosmopoliten” otelində çox qiymətli bir zinət daşının oğurlandığını bilir. Cinayətkar bu daşı bacısının saxladığı qazlardan birinin çinədanında gizlədir. Və bu qaz təsadüfən Şerlok Holmsun əlin düşür. Xəfiyyə cinayətin üstünü açsa da, canini sərbəst buraxır. Detektiv həvəskarları kitabda həmçinin Artur Konan Doylun Şerlok Holmsun macəraları silsiləsindən indiyə qədər azərbaycan dilində nəşr edilməmiş “Dodağı çapıqlı adam”, “Alabəzək lent”, “Mühəndisin barmağı”, “Məşhur subay”, “Beril tac”, “Qırmızı fıstıq”, “Gümüş”, “Sarı sifət” hekayələrini də oxuya biləcəklər.

Dünya şöhrətli ingilis yazıçısı, klassik detektiv janrının ən böyük nümayəndələrindən biri Artur Kanon Doylun (1859-1930) “Qozbel” adlı kitabına müəllifin müxtəlif illərdə qələmə aldığı “Qloriya Skott”, “Mesqreyvlərin ayini”, “Qozbel”, “Daimi xəstə”, “Tərcüməçinin başına gələn hadisə”, “Dəniz müqaviləsi”, “Holmsun son əməliyyatı”, “Boş ev” və digər hekayələr daxil edilib. Kitabda A.K.Doylun ədəbi qəhrəmanı Şerlok Holms və Doktor Uotsonun müxtəlif macəraları yer alıb. Kəskin süjetli hadisələr oxucunu öz ardınca aparır.
Romanın birinci hissəsində Şerlok Holms professor Moriartinin əlaltısı Porlokdan şifrəli məktub alır. Məktubda mister Duqlas adlı birinə sui-qəsd hazırlanması barədə xəbər verilir. Bir qədər sonra Şerlok Holmsun Beyker-stritdəki evinə mister Duqlasın öz malikanəsində qətlə yetirilməsi xəbəri gəlir. Şerlok Holms təhqiqata başlayır. Lakin məlum olur ki, qətlə yetirilən mister Duqlas deyil, onu qətlə yetirmək istəyəndir.
İkinci hissədə xəfiyyə Berdi Edvards, Makmerdo adı ilə Vermiss şəhərciyinə gəlir. O, "Təmizləyicilər"in dəstəsinə daxil olmaq istəyir və bacarır. Maraqlı, həyəcanlı hadisələr silsiləsi də bundan sonra başlayır...


Roman XIX əsrin sonlarında Rusiyadakı ictimai-siyasi vəziyyət və daxili işlər orqanında çalışan bir gəncin taleyindən bəhs edir. Gənc Fandorin erkən yaşlarından yetim qalır və öz fərasəti, dərin düşüncəsi, tərbiyəsi və əzm­karlığı ilə sadə kargüzarlıqdan Axtarış idarəsinin məşhur əməkdaşına çevrilir. Lakin bu ona heç də asan yolla başa gəlmir. O, Rusiyada fəaliyyət göstərən beynəlxalq terror təşkilatının ifşa olunmasında müstəsna xidmətlər göstərir və bu işdə əzablı bir yol keçir. Gənc Fandorinin fəaliyyəti yuxarı təbəqələrdə yüksək qiymətləndirilir və ona böyük etimad göstərilir. Onun dərin intuisiyası nəticəsində təşkilatın əsas liderləri aşkar olunur və zərərsizləşdirilir. Bütün bunlarla yanaşı, onun şəxsi həyatında da böyük dəyişikliklər baş verir.

Təəssüflər olsun ki, həyatının ən xoş günü, evləndiyi gün onun üçün faciə ilə nəticələnir. Səmimi və təmizqəlbli bu gənc qısa, amma dəhşətli bir həyat yaşayır.


...Boş mənzildə Amerika vətəndaşı İnok Drebberin meyiti tapılır. Məşhur xəfiyyə-məsləhətçi Şerlok Holms öz “həmkarları” polismenlər Lestreyd və Qreqsona nisbətən bu ölüm hadisəsinin səbəbini tez aşkar edir və belə qənaətə gəlir ki, İnok Drebberin ölümünə səbəb zəhərdir. Meyitin cibindən “C.H. Avropadadır” yazılan teleqram, cinayət baş vermiş yerdə isə nişan üzüyü tapılır. Divara qanla “RACHE” (almanca “qisas” deməkdir) yazılıb. Eyni zamanda, mehmanxana nömrəsində İnok Drebberin katibi Cozef Stencersonun meyiti və iki həb aşkar olunur. O, bıçaqla qətlə yetirilib. Şerlok Holmsun təhqiqatı nəticəsində məlum olur ki, həblərdən biri zəhərsiz, ikincisi isə zəhərlidir.
Sonra məlum olur ki, “Al-qırmızı etüd” romanındakı bütün həyəcanlı, kriminal hadisələrin kökünü 30 il əvvəldə axtarmaq lazımdır...

Dünya detektiv ədəbiyyatının banisi hesab edilən ingilis yazıçısı Artur Konan Doylun məşhur Şerlok Holmsun macəraları silsiləsindən olan növbəti – “Ebbi-Qreyncdə qətl” kitabına müəllifin “Rəqs edən fiqurlar”, “Tənha velosipedçi qadın”, “Qara Piter”, “Milvertonun ölümü”, “İtkin düşmüş reqbiçi” və digər hekayələri daxil edilib. Digər əsərlərində olduğu kimi burada da bir-birindən maraqlı, gərgin, həyəcanlı hadisələr oxucunu öz arxasınca çəkib aparır. Detektiv həvəskarlarının bu kitabı da böyük maraqla qarşılayacağına əminik.
"Sahil əməliyyatı", "Qara volqa", "Brilyant məsələsi" kimi maraqlı əsərləri ilə xatırlanan, "Azərbaycanfilm"in istehsalı olan "İstintaq davam edir" bədii filminin ssenari müəllifi kimi yadda qalan Cəmşid Əmirovun "Şəhər yatarkən" kitabına müəllifin eyni adlı povesti ilə yanaşı, II Dünya müharibəsindən sonrakı illərdə Almaniyada çalışan azərbaycanlı çekistin həyatından bəhs edən "Mənim ilk məhəbbətim" povesti də daxil edilib. Hər iki əsərdə ötən əsrin kriminal və siyasi tablosu, müxtəlif tipli insan xarakterləri, köhnə Bakı mənzərələri öz əksini tapıb.
“Səssiz şahid” Aqata Kristinin dramatikliyi ilə seçilən romanlarından biridir. Əsərdə Erkül Puaronun öz iti zəkası, fəhmi ilə daha bir cinayət hadisəsinin üstünü açmasından bəhs edilir. Bu cinayət də çox zaman olduğu kimi tamah məqsədilə törədilib. Həm də qatil bir özgəsi deyil, qurbanın yaxın qohumlarından biridir. Lakin bu, onlardan hansıdır? Çünki özündən sonraya xeyli miras qoyub gedəcək yaşlı qarının ölümündə az qala qohumunun hamısı maraqlıdır. Bununla belə onlardan biri tələsib və qarının öz əcəli ilə ölümünü gözləməyib. Əsərin sonunda Puaro oxucular üçün də gözlənilməz olaraq sahibə xanımın ölümünü kimin təşkil etdiyini tapır.
Aqata Kristi “Qolf meydançasında qətl” romanında detektiv Erkül Puaro və kapitan Hastinqs daha bir müəmmalı qətl hadisəsinin üstünü açırlar. Qəhrəmanlar olduqca dolaşıq bir məsələnin düyününü açarkən müxtəlif əlavə hadisə və əhvalatlarla qarşılaşmalı olurlar. Əsərdə Hastinqsin eşq macəraları da yer alır. Hadisələr elə gərgin və həyəcanlı axınla davam edir ki, əsəri birnəfəsə oxuyub, bütün bu müəmmaların nə ilə nəticələnəcəyini bilmək ­istəyirsən.

Abunə Ol