Hər gün yeni bir kitab

QANUN NƏŞRLƏR EVİ

Qanun.Az | Kitablar | Ədəbiyyat

Giriş

 Səbət

Səbət
İstifadəçi

Giriş
Menyunu bağla

Bestseller

Kateqoriyalar

Cildi

Müəlliflər

Tərcüməçilər

Yuval Harari anlaşılması gündən-günə çətinləşən yaşadığımız bu dünyadan yazır. İnsanlıq özünü nüvə müharibəsi, ekoloji fəlakət və texnoloji qəzalar təhlükəsindən necə xilas edə bilər? Yalan xəbərlər epidemiyası ilə mübarizə aparmaq iqtidarındayıqmı? Dünyada hansı sivilizasiyalar dominantlıq edir – Şərq, Qərb? Terrorizmə qarşı hansı tədbirləri görməliyik? Müəllif özünəməxsus aydın fikirlərlə diqqətimizi bugünkü dünyamızın heyrətamiz problemlərinə cəlb edir. Kitabın əsas hədəfi oxucunun fikrini dünyadakı daimi və təhlükəli dəyişikliklərə yönəltmək, həm də onda həyat qabiliyyətini gücləndirmək, rəhmdillik hissini və kritik düşünmə vərdişlərini inkişaf etdirməkdir.
Əsər geridə qalmış bir ölkənin tərəqqi yoluna çıxmasının və çiçəklənməsinin özünəməxsus modelini yaradır. Yarıreal, yarıutopik təsvirlərlə təqdim olunan Finlandiya sonradan, doğrudan da, ciddi tərəqqi yolu keçərək dünyanın ən qabaqcıl və zəngin ölkəsinə çevrilir. Bu əsərin yazılmasına qədər və ondan sonrakı Finlandiyanın müqayisəsi heyrət doğurur.









Bu kitab xoşbəxtlik və zənginlik arzusunda olan və bunu necə əldə etməyin yollarını öyrənmək istəyənlər üçün yazılmışdır. Bu yolların çətin, lakin şərəfli olduğunu qeyd edən müəllif həmin arzulara çatmağın 7 strategiyasını göstərmişdir. Bu strategiyalar biri digərini tamamlamaqla anlaşılan ardıcıllıqla verilmişdir. Kitab geniş oxucu dairəsi üçün nəzərdə tutulmuşdur.
26 nəşriyyat bu əsəri çap etməkdən imtina edir. Müəllif 27-ci dəfə şansını yoxlayır və nəticə gözlənilməz olur: əsər 5 milyon nüsxə ilə satılır. Mütəxəssislər bu kitabı “kitab nəşri tarixinin fenomeni” adlandırır. O, oxucunu ruhlandırır, bəşəri suallara fərqli müstəvidən baxmaq fürsəti yaradır, Tanrı ilə münasibətlərin yeni aspektlərini ortaya qoyur. Yazıçı Ceyms Raylinin sözlərinə görə, “Daxma” bəşər tarixinin ən çətin sualına cavab verir: əgər Allah hər şeyə qadirdirsə və mərhəmətlidirsə, niyə dünyamızda bu qədər dərd və şər var?





David Nichollsun romanları xoşagələndir, lakin həmin romanları tipik qadın romanı da adlandırmaq olmaz: müəllif əsərlərində heç də göz yaşını və emosiyanı hədəfə almır. Onun əsərlərində gözqamaşdıran gözəllər və varlı, cazibədar kişilər yoxdur. Onun qəhrəmanları real, həyatın bütün üzünü görmüş ən adi insanlardır. Onun əsərlərini təkcə qadınlar deyil, həm də kişilər oxuyur. Onun kitabları sevgidən danışır, amma qadınların mütaliə etdiyi sevgi əsərlərindən deyil.
“Biz” əsəri evliliklə “korlaşan” sevgidən, amma yenə də ər-arvadın o sevgini yenidən canlandırmaq, “diriltmək” istəyindən bəhs edir. D.Nicholls bu əsəri ilk növbədə ailə münasibətlərinə həsr edib – insanın onun üçün əziz, doğma olanlar: arvadı, oğlu, bütün ailəsi uğrunda apardığı mübari­zəsindən, çabasından söz açıb. Qəhrəmanın keçmiş hisslərini qaytarmağa can atması, doğmaları ilə münasibətini yoluna qoyması, onları anlaması əsərin əsas süjet xəttini təşkil edir.
20 il sonra, oğlu kollecə getməzdən öncə Konni Duqlasa ayrılmalı olduqlarını, bundan sonra həyatda onsuz – tək addımlayacağını bildirir. Amma ayrılmazdan öncə ailəlikcə Avropaya “Böyük gəzinti”yə getmə­lərinin lazım olduğunu söyləyir. Gəzintidən sonra isə ayrılacaqlar… Duqlas da son dəfə birlikdə gəzintiyə çıxmağa, bəlkə də, işləri çözə bilmək üçün imkan əldə etmək, yenidən bir-birinə aşiq olmaq və ailəsini dağılmaqdan qorumaq ümidiylə bu qərara “hə” deyir.

Varis Dirie onu dünyaca məşhur edən bu romanı yazmaq üçün nə təxəyyülünə güc verib, nə də başqalarının həyat hekayələrini soraqlayıb. “Səhra çiçəyi” müəllifin öz başına gələnlərdir: kəlməbəkəlmə, addımbaaddım yaşadıqlarıdır. Allahın sevib yaratdığı insana əta etdiyi gözəlliklərdən necə məhrum edilməsi, həyat eşqinin hələ körpə qızcığazkən balaca köksündə boğulması, dünyəvi həzlərə həsrət qoyulması barədə olduqca qəmli bir hekayət danışır Varis. Somalinin dodaq çatladan susuz səhralarında boy atan bu çiçək, onu məhv olmağa qoymayan, bu günün Varisi edən sevgidən, insanlara, yaradılışa inamdan rişələnir. İllər sonra məşhur model olan qəhrəmanımız geridə qoyduğu tarixçəsini bölüşməyi özünə borc bilir – beləcə, “Səhra çiçəyi”ni yazmaqla özünü yazıçılıqda da sınayır. Varis Afrikanın dəhşətinə çevrilmiş “qız sünnəti”nin onu necə şikəst etdiyini anladığı andan buna qarşı mübarizə aparmağa çalışıb. “Səhra çiçəyi” həm də bu mübarizənin bir formasıdır. Tezliklə bestsellerə çevrilən əsəri ilə o, daha da məşhur olmaqla bərabər böyüklərin əlində alətə çevrilən qızcığızlara qurtuluş yolu da göstərmiş olur

20-ci əsrin ən tanınmış geyşalarından biri Nitta Sayurinin həyat hekayəsi. Hətta siz məhəbbət romanlarının pərəstişkarı deyilsinizsə və ümumiyyətlə, ilk baxışdan məhəbbətə inanmasanız belə, “Gündoğan ölkə”nin özünəməxsus mühitinə daxil olmaqdan və kənar şəxslər üçün qapalı, gizli bir cəmiyyəti daxildən tanımaqdan inanılmaz həzz alacaqsınız.
Roman yalnız kişilərə məxsus olan tam başqa bir aləmə, başqa bir dünyaya açılan qapıdır. Bu aləmdə qadınlar heç vaxt düşündüklərini deyil, yalnız onlardan gözlənilənləri, tələb olunanları deyirlər. Onlar heç bir istəyə və seçim hüququna malik ola bilməzlər. Qadınlar doğulandan ölənə qədər onlar üçün əvvəlcədən müəyyən olunmuş yolla irəliləyirlər, bu yoldan sapma ehtimalı çox cüzidir. Onlar mövcuddurlar, ancaq demək olmaz ki, yaşayırlar. Ona görə ki, yalnız tənhalıqda özləri kimi ola bilirlər, ancaq bu hüquqdan da məhrumdurlar.
Geyşalıq işi – gözəllik və incəsənətdir. Bu ancaq kənardan belə görünür. Daxildən isə yalnız ağır, üzücü əmək, riyakar bir peşədir. Bundan savayı, heç nə yoxdur. Tamamilə heç nə.
Zəngin bir ailənin on üç yaşlı ağıllı və savadlı qızı... Fəlsəfəyə aid əsərlər oxuyan, Motsartı dinləyən, əsl kimliyini çalışdığı kompleksin bütün sakinlərindən gizlədən yaşlı qapıçı qadın... İllər sonra Parisin dəbdəbəli komplekslərindən birində məskunlaşan varlı bir yapon... Bu üç bir-birindən fərqli insanı birləşdirən ümumi cəhət var... Amma nədir? Təsadüfən bir-birini tapan bu üç insanın həyatında nə dəyişir? Bəzən bir insan həyatımıza günəş tək doğur. Qaranlıq həyatımızı aydınladır. Gözlərimiz bu aydınlıqdan qamaşarkən bizi təqib edən o qaranlığı unudub özümüzü günəşin ağuşuna atırıq.

Cəmiyyətdəki sinif fərqlərindən, sadə insanların ruhundakı zadəganlıqdan, zənginlərin mənəvi kasıblığından, hamı kimi olmamağın, hamı kimi düşünməməyin insanın həyatında yaratdığı çətinliklərdən, ruhən yaxın olan insanlar arasındakı səmimi hisslərdən bəhs edən möhtəşəm bir əsər...

Real hadisələrə əsaslanan və insan təfəkkürünü alt-üst edən bu əhvalat, çoxsaylı şəxsiyyətə malik olan Billi Milliqanın parçalanmış düşüncə aləmini açır. Qarşımızda düşüncə tərzinə və məqsədinə görə müxtəlif olan 24 nəfər ayrı-ayrı şəxs: böyüklər və uşaqlar, kişilər və qadınlar, kriminala meyilli şəxslər – öz hərəkətinə nəzarət etməyə imkan vermədən onun cisminə sahib olmaq uğrunda mübarizə aparır. Parçalanmış şəxsiyyət təbiətin insan üzərində özünəməxsus təcrübəsidir. Şüurun belə naməlum vəziyyətinin öyrənilməsi, özümüz haqqında bizə çox şey söyləyə bilər, ağlın vücud üzərində nəzarət baxımından vacib olan hansısa bir şeyi dərk et­məsinə imkan verər.

“Kitabda nəql edilən hadisələr mənim də başıma gəlib, özü də dəfələrlə”. Bu gün dünyaca məşhur olan yazıçı Paulo Coelhonun romanı bu sözlərlə başlayır. O vaxt – 70-ci illərdə isə o hələ yazıçı olmağı arzulayırdı, təhlükəli səyahətlərə çıxır, öz qorxuları ilə mübarizə aparırdı, bütün dünyada yayılan hippi hərəkatının azadlıq ruhunu canına çəkirdi. “Gözəgörünməz poçt” möhtəşəm hərəkatlardan və marşrutlardan xəbər verirdi. Yeni biliklər axtarışında olan gənclər mənəvi müəllimlərinin sorağına çıxır, “Hippi cığırları” ilə Maçu-Pikçuya (Peruda qədim şəhər), Tiauanakoya (Boliviyada qədim, sirli şəhər), Lxasaya (Tibetdə vilayət, Lxasa – “Allahların məskəni”) yol alırdı. Romanın qəhrəmanları Paulo və Karla 70 dollara yeni bir “Hippi cığırı” ilə Amsterdamdan (Niderland) Katmanduya (Nepal), macəralarla dolu çox qorxulu bir səfərə çıxırlar. Nədir bu cəsur gəncləri belə uzaq səfərə səsləyən? Başsız bir qəbilə nələr arzulayır? Doğma evlərindən ayrılmağa bunları nə vadar edir? “Əziz ata, mən bilirəm ki, sən istəyirsən, mən oxuyub diplom alım, amma bunu hər vaxt etmək olar, indi isə mənə həyat təcrübəsi lazımdır” – bu həmin gənclərin valideynlərinə yazdığı məktubdur. Gəlin, biz də onlara qoşulub arzuların arxasınca gedək. Uşaqlara xas olan sevinclərin ardınca, o yerlərə gedək ki, orada sən özünü xoşbəxt hiss edirsən, o yerdə ki, hər şey mümkündür, qəlbin də sevgi ilə doludur! 


Hadisələr xoşbəxt bir dünyada baş verir. Bəşəriyyət sağlamdır, texnoloji cəhətdən inkişaf edib. Müharibələrin və yoxsulluğun kökü kəsilib. Bütün irqlər bərabər və səadət içərisində yaşayır. Ancaq bu dünya ciddi deyil, ironikdir. Ağlagəlməz inkişaf fərd üçün çox vacib olan dəyərlərin məhv edilməsi nəticəsində əldə olunub. Ailə, mədəni müxtəliflik, incəsənət, ədəbiyyat, fəlsəfə artıq yoxdur. İnsanlar genetik çoxalma ilə nəsil artırır. Təbəqələrə ayrılma doğumdan əvvəl baş verir. Uşaqları inkubator fabrikində yetişdirirlər. Təhsil prosesində onlara öz təbəqələrinə məhəbbət, yüksək təbəqəyə hörmət, aşağı təbəqəyə laqeydlik aşılanır. Bütün bu səbəblərdən əsərin utopiya, yoxsa distopiya olduğunu söyləmək çətindir. Lakin onu daha çox satirik utopiya kimi səciyyələndirirlər.

Gələcəyin lideri kim olacaq? Şəxslərmi, təşkilatlarmı? Mürəkkəb zamanımızda sabaha hökm etməyin hansı mümkün yolları vardır? Gözləmə mövqeyindən çıxış edənlər geridə qalmağa məhkumdur. Hətta bəlkə həyatda qalmaq onlar üçün çətin olacaq. Bu kitab hərəkətə keçməyə dəvət edir və gələcəyi idarə etməyi öyrədir. Həm də ehtimallarla deyil, konkret göstəricilərlə.Burada qaldırılan problemlər və açılan müzakirələr artıq bütün inkişaf etmiş və inkişaf etməkdə olan ölkələrdə özünü göstərməyə başlayıb. Problemləri aşkara çıxarmaq, təhlil etmək və həlli yollarını tapmaq mümkündür. Bu istiqamətdə işləyən mütəxəssislər də var. Lakin sayları yetərli deyil. Kitab bu boşluğu doldurur.



Karma nədir? Əksər insanlar onu yaxşı və pis əməllərin nəticəsi kimi başa düşür. Yəni aqibətimizi müəyyən edən mürəkkəb bir mexanizm. Əslində isə karmanın mükafat və cəza ilə heç bir əlaqəsi yoxdur. O, sadəcə olaraq hərəkət deməkdir: sizin hərəkətiniz, sizin məsuliyyətiniz. Karma sizin yaratdığınız daxili dövrədir. O, yalnız sizin niyyətiniz və hadisələrə necə reaksiya verməyinizlə müəyyən olunur.
Bu kitab sizi qorxu içində qalan sərnişindən öz taleyini idarə edən sürücüyə çevirəcək. Şüurlu yaşamaq və hər anı tam şəkildə duymaqla siz dövrədən qurtula bilərsiniz. Kitabdakı təlimlər sizə mürəkkəb dünyada xoşbəxt yaşamağı öyrədəcək

Dünya şöhrətli Amerika yazıçısı və filosofu Anthony Robbinsin təqdim olunmuş bu kitabı, çox güman ki, sizdə dərin maraq oyadacaq, yaşam fəlsəfəsinə dair sizə geniş məlumat verəcək. Uşaqlıq çağlarını uğursuz, kasıb ailədə yaşamış, heç bir ali təhsili olmayan, yalnız həyati müşahidələrinə arxalanıb daxili gücünə üz tutaraq şöhrət qazanmış bir adamın həyat hekayələrini maraqla qarşılayacaqsınız. Kitabda yaşamağa belə ümidini itirmiş insanlara ruhdan düşmədən öz daxilində uyuyan nəhəng gücü oyatmağın, yaşamaq üçün pul, biznesdə isə uğur qazanmağın yolu göstərilir, beləcə gələcəyə inam gücləndirilir. Müəllifin tövsiyələri nəticəsində həyatın çətinliklərinə davam gətirməyən, yaşamağa ümidini itirmiş adamlar həyatlarını yenidən qurmağı bacarmış, yaşadıqları cəmiyyətin layiqli vətəndaşına çevrilmişlər. İnanırıq ki, Robbinsin təklif etdiyi metodlar heç vaxt köhnəlməyəcək, çıxılmaz vəziyyətlə üzləşmiş insanların yaşamağa olan inamın gücləndirilməsi yolunda əvəzsiz məsləhət xarakteri kimi yadda qalacaq.

Hər kəs öz həyatını istədiyi kimi qurmağa can atır. Lakin biz çox zaman bunun mümkün olmadığını düşünürük. Bu belə deyil. İnsan çox mürəkkəb mexanizmdir. Yoqa bu mexanizmin tətbiqi üçün təlimatdır. Bütün sirlər isə “Daxili mühəndislik” sistemi vasitəsi ilə açılır. Beləliklə, sevinc və rifaha nail olmağın texnologiyası hər kəs üçün əlçatan olur.Kitab “Daxili mühəndislik” sisteminə əsaslanaraq yoqanın bəşəriyyətə məlum olmayan qatlarını açır. Müəllif bu mövzuda BMT, Google, General Electric, Əmanət Bankı, eləcə də, Oksford, Stenford, Harvard, Yel Universiteti, Vorton Biznes Məktəbi, Massaçusets Texnologiya İnstitutu və s. də daxil olmaqla, bütün dünyanın ən nüfuzlu müəssisələrində uğurlu mühazirələrlə çıxış edib.Həmçinin sayı dünya üzrə 7 milyondan artıq olan fədailərin “Isha” xeyriyyə fondunun banisidir. Fonda BMT-nin İqtisadi və Sosial Şurası yanında xüsusi məsləhətçi statusu verilib.
“Sevgili Con” – sevgilisini gözlə­mək­dən yorulub başqasına ərə gedən Savannanın məktubu bu sözlərlə başlayır. Bu məktub Conun qəlbini sındırır, qadınlara, sevgiyə inamını məhv edir. Amma əsl hisslər heç vaxt ölmür.
Gəncliyin səhvini xəyanət hesab etmək düzgündürmü?
İllər keçir, Con və Savanna yenidən qarşılaşırlar. Ürəklərində yaşayan keçmiş məhəb­bətin qığılcımları yeni bir şövqlə odlanır.
Gecdir?
Xoşbəxtlik heç vaxt gec deyil.



Hər bir kəs həyatında ən azından bir dəfə də olsa özünə bu sualı vermişdir: əgər bizə keçmişə qayıtmaq kimi bir şans verilsəydi, həyatımızda nəyi dəyişərdik? Əgər nəyisə dəyişmək şansımız olsaydı, hansı səhvləri bir daha etməməyə cəhd göstərərdik? Hansı ağrını, hansı vicdan əzabını, hansı peşmançılıq hissini həyatımızdan silməyə çalışardıq? Həqiqətən də biz həyatımıza yeni bir rəng, yeni bir məna qata bilərdikmi? O zaman biz necə bir insan olardıq.




Dünya səviyyəli iş adamı, “Virgin” Şirkətlər Qrupunun təsisçisi Riçard Bransonun qələmə aldığı “Dayanma, başla” kitabını avtobioqrafiya da adlandırmaq olar. Yaxın çevrəsində “doktor Bəli” kimi tanınan Branson bu kitabda keçdiyi həyat yoluna nəzər salır, qazandığı uğurların sirlərini ən xırda detallarına qədər oxucu ilə bölüşür. İlk biznesindən gələcək ideyalarına qədər bütün mərhələləri təfsilatı ilə oxucuya çatdıran müəllif özünü iş dünyasında görən, hədəfləri olan insanlar üçün bələdçilik etməyə, yol göstərməyə çalışır. Həyata, biznesə, iş dünayasına baxışlarını ayrı-ayrı fəsillərdə, müxtəlif başlıqlar altında sadə, anlaşıqlı və ən əsası səmimi dillə ifadə edən iş adamı oxucunu öz daxili aləmi, ruh halı ilə də tanış edir, ailə, dostluq, yaxşılıq kimi anlayışların həyatında oynadığı rola toxunur. Nəşrin ana ideyası, müəllifin əsas fikri insanları hədəf­­lərinə doğru cəsarətləndirmək, onları ətalətdən xilas etməkdir. Kitabın “Dayanma, başla” adlandırılması da təsadüfi deyil. Müəllif öz həyatından nümunələr gətirərək hansı risklərə imza atdığını, bunun üçün nələri qurban verdiyini dilə gətirir, insanları “Sadəcə başla” deyərək, cəsarətli olmağa səsləyir. Siz də bu kitabı oxumaqla əsl iş adamına xas keyfiyyət­lərlə tanış olacaq, həyatınızda, məşğul olduğunuz sahədə faydalı ola biləcək məlumatlar əldə edəcəksiniz.

Dünya şöhrətli alim, avstriyalı həkim psixoterapevt Viktor Franklın bu əsəri ilk dəfə 1946-cı ildə çap edilib, 30 ildən bir qədər çox müddət ərzində 9 milyondan çox nüsxə ilə nəşr olunub. O, ABŞ-da 5 dəfə “ilin kitabı” elan edilərək, 90-cı illərin əvvəllərində, ABŞ-da insanların həyatına ən güclü təsir göstərmiş kitabların siyahısına daxil olub. Əsər Viktor Franklın II Dünya müharibəsi zamanı düşdüyü, qeyri-insani mövcudluğun hökm sürdüyü və sağqalma ehtimalının cüzi olduğu nasist konslagerlərindəki müşahidələri və təəssüratlarından bəhs edir. “Psixoloq konslagerdə” – bu kitabın altbaşlığı belədir. Bu hekayə, real hadisələrdən daha çox, təəssüratlar haqqındadır. Kitabın məqsədi – milyonlarla insanın başına gələn­ləri açmaq və göstərməkdir. Əsərdə konslager, burada bəhs olunanların hamısını şəxsən öz üzərində təcrübədən keçirmiş bir insanın nəzər nöqtəsindən göstərilir. Bu kitab konslagerlərin yetərincə danışılmış qlobal dəhşətlərini deyil, əzab dolu düşərgə həyatının məhbusun mənəvi vəziy­yətinə təsirini əks etdirir. Kitaba həm də Franklın “Birkenvaldda sinxronlaşdırma” adlı fəlsəfi pyesi də daxil edilib.
Müəllif böyük sərvət sahibidir. Qabaqcıl biznes modelləri ilə beynəlxalq miqyasda tanınan bir simvoldur. Onun unikal fəlsəfəsi var.
Başqaları təmtəraqlı həyatı seçərkən, o, həmişə təkrarsız yaşamağa can atıb. Fərqli konsepsiyası sayəsində geniş imkanları olmayan sahələrdə uğur qazana bilir. Müəllifin möhtəşəm səyahəti bu gün də müzakirə mövzusudur. O bu dəfə öz hekayəsini anladır. Həyatının ilk 43 ilində üzləşdiyi çətinlikləri bütün təfərrüatı ilə bölüşür. Bu, inadla inandığı şeyi yaratmağa çalışan bir insanın valehedici hekayəsidir. Kitab cazibədar bir tonda və cəlbedici bir üslubda yazılıb. Oxucuları cəsarət və özünəinamla bağlı uğurlu səyahətə aparır.
Frensis Fukuyama – tanınmış amerikan filosofu, politoloqu, siyasi iqtisadçısı və yazıçısıdır. Fukuyamanın 1992-ci ildə çap etdirdiyi, çox keçmədən dünyanın 20-dən artıq dilinə tərcümə edilərək beynəlxalq bestsellerə çevrilmiş “Tarixin sonu və sonuncu insan” əsəri onun dünya şöhrətli alim kimi tanınmasına səbəb olub. Fukuyamanın təqdimatında tarixin sonu heç də tarixi proseslərin dayanması və insanlığın inkişafının sona çatması kimi şərh edilmir, bu, sadəcə, insanların qarşılıqlı münasibətlərində, cəmiyyətdaxili və ölkələrarası əlaqələrdə, münaqişə və qanlı savaşlara gətirib çıxaran iqtisadi, siyasi, mənəvi amillərin aradan qalxması və öz yerini iqtisadi sahədə azad bazar münasibətlərinə əsaslanan kapitalizmə, idarəetmədə isə insanların universal bərabərliyi prinsipinə əsaslanan liberal demokratiyaya, respublika idarə üsuluna verməsidir. Fukuyama özünün tarix konsepsiyasını əsaslandırmaq üçün ən müxtəlif mənbələrdən, indiyədək mövcud olmuş aparıcı elmi-fəlsəfi cərəyanlardan söz açır və inandırıcı dəlillərlə oxucunu addım-addım “tarixin sonuna” yaxınlaşdırır.

Andreu Stilman “The New York Times” qəzetində məşhur jurnalistdir. Həyat yoldaşı ilə boşandıqdan və onun üçün hazırlanmış sui-qəsd hadisəsindən canını qurtardıqdan sonra həyatını qaydasına qoymağa çalışır. Nyu-York kitabxanalarından birinin oxu zalında, dövlətə xəyanətdə təqsirləndirilən nənəsinin günahsız olduğunu sübuta yetirməyə çalışan Suzi Baker adlı gənc bir xanımla tanış olur. Soyuq müharibə zamanı dövlətə məxsus gizli sənədləri, düşmən tərəfə keçirtməyə cəhd etdiyi üçün nənəsi haqqında edam qərarı çıxarılır. Amerikanın bəzi gizli qurumları işə qarışır. Andreu ilə Suzi çıxış yolunu Nyu-Yorkdan başqa bir yerə qaçmaqda görürlər və bu səyahət onları Arktikanın düz mərkəzinə aparıb çıxarır. Şübhə, nişanələr, ifşa və qətllər bir-birini əvəz edir.
Mark Levi sayca on altıncı romanı olan və özündə bir qədər avtobioqrafik nüansları birləşdirən «Qadın və kişi» romanında macəradolu romantika ilə komediyanı bir araya gətirir. Keçmişə boylanaraq, birinci romanının personajı memar Pol Bartonu oxuculara yenidən, bu dəfə fərqli məkanda və fərqli şəraitdə təqdim edir. Fransanın ən məhşur romançılarından biri bu əsərində bizə sevgidən, dostluqdan və tanışlıq saytlarından danışır. Pol yazıçılıqla məşğul olan və Parisdə yaşayan amerikalı memardır. Mia isə problemlərdən başını götürüb Parisə qaçan ingilis aktrisadır. Paris bu iki insanın sevgi, eyni zamanda ayrılıq şəhərinə çevrilir. «Qadın və kişi» sentimental komediyası oxucunu həm əyləndirir, həm də düşündürür. 
Yazıçı bu romanda Şimali Koreyadakı diktatura rejiminə də toxunaraq, insanları əsrin bu yaralı ölkəsinə qarşı həssas olmağa çağırır. Müsahibələrindən birində Mark Levi belə deyir: «Doğrudur ki, Şimali Koreyadakı diktatura rejminin üstündən səssiz keçirlər. Neft ehtiyatları olmadığına görə ölkənin iqtisadiyyatı heç kəsə maraqlı deyil. Halbuki, ölkə əhalisi aclıq, səfalət içində və köləlik şəraitində yaşayır. Ona görə də, mən Şimali Koreya haqqında danışmağa ehtiyac gördüm və romandakı əhvalatların bir qismini Cənubi Koreyaya köçürdüm». Bir-birinə aşiq olmamağa çalışan iki aşiqin, bir-birinə böyük hörmətlə yanaşan iki dostun sadə, lakin düşündürücü məhəbbət əhvalatı, romanın gözlənilməz sonluğu Mark Levi oxucularını təəssüratsız buraxmayacaq.
Milad bayramı ərəfəsində bir falçı istedadlı London ətriyyatçısı Alisaya tezliklə uzaq yola çıxacağını, keçmişdəki bütün sirli qapıların açılacağını və sonda taleyinin kişisi ilə qarşılaşacağını söyləyir. Falçı qadının söylədiyindən narahat olan qız, nəhayət ki, yola çıxmaq qərarına gəlir. Dostları onu bu fikrindən daşındırmağa çalışırlar. Lakin Alisanın rəssam emalatxanası üçün əlverişli və işıqlı olan evini hər vəchlə ələ keçirməyə çalışan qonşusu – İtan Daldri adlı rəssam qıza bu səyahətə birlikdə çıxmağı təklif edir. İtanla yola çıxan Alisa onu qarşıda nə gözləyəcəyini belə bilmədən Türkiyənin İstanbul şəhərinə yollanır.

Abunə Ol