Amid Səlimoğlu (Səlimzadə) 17 noyabr 1993-cü ildə Bakı şəhərində anadan olmuşdur. 2011-ci ildə Bakı Dövlət Universitetinə qəbul olmuş və 2015-ci ildə Fəlsəfə ixtisasını bitirmişdir. Hal-hazırda Xəzər Universitetində magistr təhsilini davam etdirir. “Azərbaycan Yazıçılar Birliyi”nin üzvüdür.
Məktəb illərindən ədəbiyyata olan meyli 2011-ci ildə onu ilk kitabı olan “Qaranlıqdan işığa” romanını yazmağa vadar etmişdir. Romanın mövzusu Sovet dönəminin kənd həyatından bəhs etdiyi üçün bir çox insandan həmin dövr haqqında məlumatlar almış, topladığı məlumatlar nəticəsində kitabını yazaraq 2017-ci ildə tamamlaya bilmişdir. “Qaranlıqdan işığa” romanı elə həmin ilin sonlarında nəşr edilmişdir. İlk kitabından sonra öncədən də yazmaq istədiyi ikinci kitabı, “Kimsəsiz” romanı üçün hazırlıqlara başlamışdır. Psixoloji dedektiv janrda yazılmış kitabda bəhs edilən hadisələrin çox qismi İstanbulda keçdiyindən 2018-ci ildə İstanbula getməsi “Kimsəsiz” romanını yazmağına çox kömək etmişdir. İstanbulu gəzərək lazım olan məlumatları toplamış və həmin ilin sonunda kitabı bitirməyə nail olmuşdur. Kitab 2020-ci ilin ilk ayında nəşr edilmişdir. Amid Səlimoğlu ikinci kitabından sonra bir sıra povest və romanlar da yazmışdır. Onun “Sən axı kimsən?!” povesti oxucular tərəfindən rəğbətlə qarşılanmışdır. İkinci povesti isə “Malavarın hekayəsi” adlı povestdir. Bu povestlərlə yanaşı “Sen benim 7. Günümsün”, “44 gün”, “Sən axı kimsən?! Bumeranq” povestlərinin, “Qadın və O”, “Yazıçı” hekayələrinin, “Bəyaz dəhliz”, “Vabin” romanlarının da müəllifidir. II Qarabağ müharibəsi mövzusunda yazmış olduğu və bu mövzuda ilk nəsr əsərlərindən olan “44 gün” povesti hər kəs tərəfindən rəğbətlə qarşılanmış, geniş oxucu kütləsi qazanmışdır. Povestdə şanlı ordumuzun düşmənlərimiz üzərində qazandığı zəfərlər öz əksini tapmışdır. Azərbaycan Memarlıq və İnşaat Universitetinin (AzMİU) Kitabsevərlər klubu ilə görüş keçirilmiş və görüşdə “44 gün” povesti haqqında müzakirələr edilmişdir. Bundan əvalə yazıçı haqqında bir sıra qəzetlərdə məqalələr çap edilmişdir.
Amid Səlimoğlu hal-hazırda yeni kitab və hekayələr üzərində çalışır.
