Məmməd Şair Adiloğlu 1946-cı ildə Yardımlı rayonunun Arvana kəndində anadan olmuşdur. Mərkəzi Komitənin qərarı ilə Arvana kəndi 1955-ci ildə Sabirabad rayonunun Aleksandrovka kəndinə köçürülmüşdür. Məmməd də ilk təhsilini burda almışdır.
Məmməd Şair Adiloğlu 1964-1968-ci illərdə Bakıda fəhlə işləmiş, Bakı Dövlət Universitetini bitirmişdir.
O, 1970-ci ildən təhsil aldığı kənddə Azərbaycan dili və ədəbiyyatı üzrə müəllimlik etmişdir. Hal-hazırda təqaüdçüdür.
Vətənini, yurdunu dərin məhəbbətlə sevən Şair Adiloğlunun şeirləri bədii təsvirlərlə geniş əhatə dairəsinə malikdir. Azərbaycan xalqının əsrlərlə ağır, faciəli taleyi Adiloğlunu həmişə düşündürüb. O, ədəbiyyat dərslərində xalqımızın illərlə çəkdiyi acı taleyini, ikiyə bölünmüş Azərbaycanın ağır həyatını şagirdlərinə mənimsətmişdir. Məmməd Şair Adiloğlu müstəqil olan Azərbaycanı tərənnüm edir. Qarabağın işğalı və azad olunması, 44 günlük Vətən müharibəsi ədibin əsərlərində geniş surətdə bədii əksini tapmışdır.
